Былыргы үйэлэр быыстарын
Сэгэтэ арыйар курдукпун
Байҕаллыы муҥурун биллэрбэт
Олоҥхо аар тылын аахтарбын.
Харахха көстүбэт нарын кыл –
Уйулҕам уостубат утаҕа
Дьырылыыр, дырылыыр, ыллыыр
Лирика чараҥар киирдэрбин.
Санаалыын, Сүрэхтиин сиэттиһэн
Сүпсүктээх олохтон тэйэбин
Сахалыы сиэдэрэй тыллардаах
Айымньы ааннарын астарбын.
Иһирэх иэйиинэн тиһиллэр
Бу маннык ураты дойдуга
Сиэтэҥҥин киллэрэр эбиккин –
Сахабыт баай тыла барахсан!